लाडकी बहीण योजनेमुळेच मध्य प्रदेश मध्ये भाजपाचे सरकार आले, म्हणून महाराष्ट्रातही ही योजना लागू केली – आमदार रत्नाकर गुट्टे

लाखो करोडो रुपयांचा अपहार करून बरेच जण विदेशात पळून गेले मग लाडक्या बहिणींना पैसे दिले तर काय वाईट आहे

भाजप सहयोगी पक्ष राष्ट्रीय समाज पक्षाचे आमदार रत्नाकर गुट्टे यांचे वक्तव्य

परभणी प्रतिनिधी
मध्यप्रदेश मध्ये भाजपचे सरकार येणार नाही असा सर्वे येत होता. आणि त्याच परिस्थितीत भाजपने मध्य प्रदेश मध्ये मुख्यमंत्री लाडकी बहीण योजना लागू केली. याचा फायदा असा झाला की तब्बल दोन तृतीयांश आमदार भारतीय जनता पक्षाचे निवडून आले. आणि पुन्हा एकदा भाजपचे सरकार मध्य प्रदेश मध्ये स्थापन झाले. ही योजना एवढी प्रभावी असल्याने महाराष्ट्रामध्ये देखील महायुती सरकारने लाडकी बहिण योजना सुरू केली आहे. देशातील बऱ्याच व्यापाऱ्यांनी लाखो करोडो रुपयांना चुना लावून परदेशात पळून जाण्याचा पराक्रम केला मग लाडक्या बहिणींना काही कोटी रुपये खर्च केले तर काय वाईट आहे असे वक्तव्य गंगाखेड विधानसभा मतदारसंघाचे आमदार रत्नाकर गुट्टे यांनी केले आहे.

गंगाखेड विधानसभा मतदारसंघातील आशा वर्कर अंगणवाडी सेविकांचा भव्य असा मेळावा घेण्यात आला होता. या मेळाव्यामध्ये आमदार डॉक्टर रत्नाकर गुट्टे बोलत होते.

पुढे बोलताना आमदार गुट्टे म्हणाले की मुख्यमंत्री लाडकी बहीण योजना महायुती सरकारने सुरू केली आणि आता विरोधक ही योजना जास्त दिवस चालणार नाही बंद पडेल अशी अफवा पसरवत आहेत. पण एखादी योजना सुरू होऊ शकणार नाही पण जी योजना सुरू झाली आहे ती सहजासहजी बंद करता येणार नाही. उलट लाडक्या बहिणींना जे पंधराशे रुपये सध्या मिळत आहेत त्यामध्ये वाढ ही होऊ शकते. राज्यात महाविकास आघाडीचे सरकार कधीच येणार नाही कारण त्यांच्याकडे दानत नाही आतापर्यंत जे काही देण्यात आले ते उपमुख्यमंत्री देवेंद्र फडणवीस यांच्यामुळेच शक्य झाले आहे. आता मुख्यमंत्री एकनाथ शिंदे आणि दोन्ही उपमुख्यमंत्री समर्थपणे महाराष्ट्राचा कारभार चालवत आहे त्यामुळे राज्यात येणारे सरकार महायुतीचेच असेल असेही आमदार गुट्टे म्हणाले.

लाखो करोडो रुपयांचा चुना लावून उद्योगपती देश सोडून गेले मग लाडक्या बहिणींना मदत केली तर काय चुकले

आपण पाहिलं की देशातील बऱ्याच उद्योगपतींनी लाखो करोडो रुपयांचा घोटाळा केला आणि देश सोडून पसार झाले. हजारो कोटी रुपयांचा चुना या उद्योगपतींनी आपल्या देशाला लावला. त्यामुळे सरकारने लाडक्या बहिणींच्या मदतीसाठी काही हजारो कोटी रुपये खर्च केले तर काय चुकले असेही आमदार गुट्टे म्हणाले. लाडकी बहीण योजना ही एक प्रभावी योजना असून सर्वसामान्य महिलांना याचा चांगलाच फायदा आहे ही योजना लागू करताना देखील एका विशिष्ट प्रवर्गातील महिलांनाच ही योजना लागू केली नसून सरसकट महिलांना या योजनेचा लाभ देण्यात आला आहे त्यामुळे या योजनेपासून अंगणवाडी सेविका आणि मदतनीस यांना देखील वगळण्यात आले नाही.

गंगाखेड विधानसभा मतदारसंघाचे आमदार रत्नाकर गुट्टे हे राष्ट्रीय समाज पक्षाचे आहेत राष्ट्रीय समाज पक्ष हा महायुतीचा घटक पक्ष आहे आणि त्यांनी केलेल्या या वक्तव्यावरून आता स्पष्ट होत आहे की मुख्यमंत्री लाडकी बहीण योजनाही महिलांच्या प्रती संवेदनशील तेथून पुढे आलेली नसून 2024 मध्ये होणाऱ्या विधानसभा निवडणुकीत कुठेतरी महायुतीला आपला पराभव दिसत आहे आणि पुन्हा एकदा महायुतीचे सरकार आणण्यासाठीच ही योजना सुरू केली असल्याचे स्पष्ट होत आहे. आमदार रत्नाकर गुट्टे यांनी केलेल्या या विधानानंतर मात्र आता सर्वत्र महायुतीच्या निर्णयानविषयी शंका व्यक्त केली जात आहे.